Nënkryetari i Lëvizjes Vetëvendosje, Glauk Konjufca, ka kaluar për nga numri i votave Presidenten e Kosovës, Vjosa Osmani, e cila në zgjedhjet e vitit 2021 ishte bërë personi më i votuar ndonjëherë në vend.

Sipas të dhënave të fundit, Konjufca ka grumbulluar gjithsej 302 mijë e 927 vota, të përfituara nga votat e rregullta, ato në përfaqësitë diplomatike si dhe një pjesë e votave me postë. Me këtë rezultat, ai renditet tashmë si personi i dytë më i votuar në Kosovë.

Rekordin që më herët e mbante Presidentja Osmani, me 300 mijë e 756 vota në zgjedhjet e vitit 2021, tashmë e ka kaluar Konjufca.

Ndërkohë, kryeministri dhe kryetari i Lëvizjes Vetëvendosje, Albin Kurti, vazhdon të kryesojë bindshëm listën e politikanëve më të votuar, me 385 mijë e 900 vota, duke u bërë kështu personi më i votuar në historinë e zgjedhjeve në Kosovë.

Si subjekt politik, Lëvizja Vetëvendosje deri më tani ka siguruar 467 mijë e 125 vota, duke konfirmuar mbështetjen e lartë qytetare dhe dominimin e saj në skenën politike të vendit.